بسم الله الرحمن الرحيم
رسالة الي وطني الحبيب فلسطين
كيفك يا حج ان شاء الله تمام ( اكيد مش تمام) ، ولا يهمك كلها عضة كوساية و بتفرج،طمنى عنك صحتك اوضاعك احوالك؟
صدقني يا وطني اني بحبك وبموت فيك وانت اكتر واحد بحبو في العالم ، اشتقت لحضنك الدافي ،متذكر يا وطن بس كنت اسهر انا وياك بالليل و نتطلع على النجوم واحكيلك شوف يا زلمة حتى النجوم في فلسطين بتضحك،ايييييه و الله ايام بس حزرك بترجع لما لأ؟
خليها على ربك رح ترجع بس استنى شوي ، هاي الدول العربية ما شاء الله اتحدت و رفضت التطبيع مع اسرائيل وما بترد على حكي امريكيا ، وكلو عال العال،صحيح انو في بينهم مشاكل وصحيح انو اللاجئين لسى ما رجعوا وصحيح انو الشهداء كل يوم بيزيدو و الجرحى كمان ،بس مش مشكلة كله علشان سواد عيونك يا وطن بهون،ويرخصلك الغالي.
امبارح حلمت حلم خير اللهم اجعله خير ، انو اللاجئين رجعوا على بيوتهم و اراضيهم و رجعوا يزرعوا اراضيهم خوخ ودراق و مشمش وزيتون و ليمون و عنب ، وقال يا حج انت جاي علينا و بتحكيلنا الله يعطيكم العافية يا اولاد ،و قال احنا بنحكيلك الله يعافيك و يطول عمرك(هذه اذا ضل من عمرك شيئ).
علشان ما تحكي عني اني مجنون ، انا ما صدقت ولا رح اصدق هالحلم هاد بالمره ، لانو اللي شايفه لا بل عفوا اللي شايفينه بيقول غير هيك ، اللي شايفينه كثير ، جدار عازل وتخاذل الزعماء العرب ، وانا بلغتي بسميها ‘صرصره’ وهاي جاي من كلمة ‘صرصور’ يعني بيصيروا صراصير ، وما شاء الله بوش عامل الدول العربية فنادق وبنام وين برتاح ، يخزي العين اااااااااااااااااااااااااااااااااااااه يا وطني شو بدي احكيلك.
لا و اللي زاد الطين بله ، الجدار العازل اللي الصراصير متل الحكام العرب ما بيقدرو يدخلو منو ، هيك يا وطني خربوك و قسموك اكثر من ما انت متقسم ،لا وزيادة على هيك بيطلعلك الفصائل مبلشين في بعض طخ ، قال يعني زلام ما شاء الله عليهم بخرهم يا وطن من عين الحسود لاني في المهجر مش قادر ابخرهم ،،،ههههههههه .
بس الواحد شو بدو يقول ؟؟؟؟ الله يرحم ابو عماررو احمد ياسين و عبد العزيز الرنتيسي و ابو جهاد و الشقاقي و ابو علي مصطفى ، ويفك اسر مروان البرغوثي وكل اسير بجاه الحبيب المصطفى محمد صلى الله عليه وسلم.
انت طول عمرك تنصحني يا وطن ، بس اجا اليوم اللي انا بدي انصحك فيه ، سيبك من الماضي و اطوي صفحته وافتح مع الحاضر و المستقبل صفحة جديدة بيضاء متل الثلج ولا يهمك اللي صار ، يمكن يكون درس نتعلم منو شيئ على الاقل.
دير بالك على حالك يا وطن ،دير بالك على حالك يا حج ،،عنجد الله يعينك شو بدك تتحمل اليهود و امريكيا و الدول العربية والفصائل……… .
توكل على الله و صلي على النبي و اتاكد انو انت في القلب و البال و الروح وما رح ننساك و اذا احنا متنا فاعلم انو احنا اكيد علمنا ابنائنا قبل ما نموت كل شيئ عن فلسطين و حكينالهم عن سهولها و بياراتها و جبالها و الكرم و نبع المي و شجرة الزيتون.
المهم دير بالك على حالك منيح … ولا اله الا الله محمد رسول الله
وخير السلام الختام
موضوع: رسالة الي وطني الحبيب فلسطين 
الجمعة 16 أكتوبر 2009, 12:27 pm
